Timor-Leste hanesan nasaun joven hari'i iha Milenium sekulu XXI, restaura hikas independensia iha loron 20 fulan Maiu tinan 2002. Molok hari’i CCI-TL, Sétor privadu namkari ketak-ketak no laiha mahon ida atu reprezenta emprezariu no negosiu nain sira iha Timor-Leste. Maioria atividade ekonomia depende deit bá Governu no despeza públiku atu sustenta dezenvolvimentu nasional.
Iha sikun seluk, sétor emprezarial no negósiu ki’ik sira hasoru obstaklu barak hanesan frakeza iha nivel abilidade, laiha asesu bá kapital finanseiru no sidauk iha lei kona-bá rai no propriedade, hasoru mós problema seluk hanesan, falta Infrastrutura, Airoportu, Portu, Eletrisidade no Rekursu sira seluk atu fo apoiu bá kresimentu negósiu nian. Maibe somente, reseita sira mai husi Mina no Gas iha tasi Timor (Timor Gap) maka sai hanesan fonte finanseiru bo’ot bá Timor-Leste.
Câmara de Comérçio e Indústria de Timor-Leste (CCI-TL) hahu funda iha loron 17 fulan Abril tinan 2010, nu’udar sumbriña bá emprezariu sira. Organizasaun emprezariál sanulu resin hitu mak hari’i Câmara de Comérçio e Indústria de Timor-Leste (CCI-TL). Istoria CCI-TL hahu iha loron 16 Fevereiru 2009 bainhira Prezidente Forum Emprezariu, Sr. Julio Alfaro Duarte J. De Araújo, hetan karta ida ne’ebé diriji husi Ministru Turismu Komersiu Industria, Sr. Gil Alves, iha tempu governasaun Aliansa Maioria Parlamentar ne’ebé husu bá Prezidente Forum Emprezariu, Sr. Julio Alfaro Duarte J. De Araújo, atu fo pareser no kolaborasaun kona-ba projetu atu kria CCI-TL ho nia objetivu atu bele alkansa sétor privadu organizadu no internasionalmente istoriku numeru ida iha nasaun foun ne’e.
Iha loron 28 fulan Dezembru 2009, Primeiru Ministru, Sr. Jose Alexandre Kay Rala Xanana Gusmão, husu atu lalais hari’i CCI-TL ho partisipasaun emprezariu nasional, munisípal, postu administrativa, koperativa no asosiasaun. Hari’i tiha CCI-TL iha loron 17 fulan Abril 2010, Sr. Julio Alfaro Duarte J. De Araújo, eleitu nu’udar Prezidente CCI-TL bá períodu 2010-2014 no deklara konsolidasaun CCI-TL iha munisípiu hotu nomós RAEOA liu husi eleisaun demokratika hodi foti prezidente CCI -TL iha munisípiu ida-idak. Rezultadu Kongresu Nasional CCI-TL iha inisiu fulan Jullu 2014, eleitu prezidente CCI-TL Sr. Oscar Lima bá períodu 2014-2018. Sr. Oscar Lima mós hetan re-eleitu iha eleisaun demokratiku liu husi kongresu nasional CCI-TL bá períodu mandatu 2018-2022. Kongresu Nasional CCI-TL bá da-Haat iha fulan Novembru 2022, eleitu prezidente Sr. Jorge Manuel de Araújo Serrano bá períodu 2022-2026.
Uainhira hari’i iha Abril 2010, CCI-TL foka liu bá prioridade 3 (Tolu):
1. Konsolidasaun institusional, ho kriasaun CCI-TL iha Munisípiu sira hotu
2. Hadia kapasitasaun Jestaun Organizasional nian iha área Advokasia
3. Kria Portfóliu Serbisu hodi responde bá nesesidade membru sira
CCI-TL nia objetivu fundamental maka atu sai hanesan Parseiru Governu nian bá dezenvolvimentu ekonómiku no mós organizasaun ida ne’ebé reprezentativa bá Komunidade emprezarial. CCI-TL hetan rekoñesimentu husi Governu Timor-Leste hanesan Parseiru Estratéjiku ho baze artigu 138 Konstituisaun RDTL, Rezolusaun Governu no. 17/2012 data 13 de Junho:
Iha mandatu Prezidente CCI-TL, Sr. Jorge Manuel de Araújo Serrano períodu 2022-2026, mai ho programa sanulu resin rua (12) atu dezenvolve sétor privadu no kontribui hodi hasa’e kresimentu ekonomia;
1. Konsolidasaun Câmara de Comércio e Indústria de Timor-Leste (CCI-TL):
Organiza fali Estrutura CCI-TL iha Munisípiu liu husi kongresu no asegura estrutura funsiona iha nivel munisípiu.
Organiza fali Sekretaria Nasional CCI-TL hodi fornese servisu di'ak bá nia membru sira
Estabelese baze dadus no halo análize komprensivu ida kona-bá nesesidade no dezafiu sira husi atividade negósiu membru sira-nian.
Halo revizaun bá lejislasaun relasiona ho Lei CCI-TL no mós lejislasaun relasiona ho atividade ekonómika/business.
2. Formasaun no Kapasitasaun
Fó formasaun no kapasitasaun bá emprezáriu sira kona-bá asuntu empreendedorismu, komérsiu, estratéjia negósiu, marketing, finansas, no asuntu seluk ne'ebé hanesan importante bá sira nia dezenvolvimentu.
• Hasa’e koñesimentu iha área agrikultura, hodi hasa’e produsaun agrikula iha rai laran, empregu no auto emprego.
• Forma no reforsa Mikro, Pequena no Media Empreza sira hodi hametin indústria ki’ik sira (home industry), no transforma sétor informal bá sétor formal.
3. Servisu Asésu
Promove aksésu bá informasaun importante no rekursu sira importante bá emprezáriu sira, hanesan informasaun merkadu, lejislasaun, no oportunidade negósiu. Dezenvolve website atualizadu no plataforma mídia sosial, produs boletim trimestral CCI-TL nian atu promove atividade, eventu no produtu sira.
4. Eventu no Feira
Organiza eventu no feira omérsiu lokál no internasionál atu promove produtu no servisu lokal, haktuir oportunidade negósiu no estabelese konexaun entre emprezáriu sira iha setór komérsiu. Promove komérsiu elektróniku, sustentabilidade no transformasaun dijital.
5. Advokasia
Forma Gabinete Jurídiku, Reprezenta interese negósiu sira iha nivel governu no instituisaun estadu sira bá regulamentu no polítika ne'ebé afeta setór komérsiu. Reforsa reprezentasaun no defeza interese membru sira nian iha Governu no instituisaun Estadu sira.
6. Servisu Promosaun
Promove produtu no servisu lokal liu husi kampaña promosaun, marketing Online, no estratéjia komunikasaun sira seluk.
7. Konsellu no Mentoria
Fó konsellu no suporta bá emprezáriu sira, inklui mentoria husi emprezáriu sira ne'ebé iha esperiénsia iha setór komérsiu.
8.Kolaborasaun ho Instituisaun Seluk
Kria kolaborasaun ho instituisaun seluk, hanesan universidade, asosiasaun indústria, no sira seluk atu dezenvolve setór komérsiu no fó benefísiu bá komunidade negósiu. Hari’i Laboratóriu teste bá aihan no material sira hodi garante kualidade komérsiu.
9. Estabelese parseiru internasionál ho kámara komérsiu seluk atu fasilita komérsiu internasionál no oportunidade bá eksportasaun.
Reforsa CCI-TL nia partipasaun iha ASEAN BAC no CE-CPLP.
10. Halo peskiza no análize kona-ba merkadu atu fornese informasaun atualizadu kona-ba tendénsia no oportunidade sira iha setór komérsiu no indústria.
Promove inovasaun no empreendedorizmu liu husi inkubadora negósiu no programa apoiu bá membru sira.
11. Kria programa responsabilidade sosial korporativu atu envolve membru negósiu sira iha Komunidade nia leet.
Amplia rede kontaktu kámara nian, promove enkontru regular no grupu diskusaun. Organiza kampanha promosaun no marketing atu aumenta konsiensia kona-ba benefísiu hodi sai membru kámara nian.
12. Valoriza rezultadu no impaktu husi inisiativa sira ne'ebé implementa iha tinan sira liu bá.
Halo peskiza ká avaliasaun bá satisfasaun membru sira.
