Kolleita Manu (Broiler) Husi Rezultadu Investimentu Timor-Oan

Kolleita Manu (Broiler) Husi Rezultadu Investimentu Timor-Oan Servisu Sazonál Australia Nian

Ohin, 22 Jullu 2019 – Movimentu Asaun Ekonomia Komunitária (MAEKOM), ne’ebe mak hamaha a’an iha CCI-TL nia okos, núdar grupu ida ne’ebé kompostu husi Timor-oan sira ho profisaun no esperiénsia oin-oin ne’ebé kompromisu atu garante dezenvolvimentu ekonomia iha Timor-Leste, liu-liu iha setór produtivu agrikola nian, nune’e bele hakbi’it ekonomia família no kresimentu ekonomia nasaun nian.

Iha biban ida ne’e Presidente Kamara Komérsiu no Industria Timor-Leste (CCI-TL), Sr Oscar Lima realsa katak hahú negósiu ho eskala ki’ik núdar ezemplu di’ak atu mehi ba ida bo’ot sé ita badinas, pasénsia no servisu maka’as tanba sai emprezáriu la fásil.

“Ha’u agradese ba alin feto nain hitu no mane nain ha’at ne’ebé ohin investe hodi hakiak manu-frangu, ne’e hatudu ba Governu katak setór privadu mak sei ajuda Governu nia kresimentu ekonomia maske ohin loron kuantidade investimentu setór privadu Timor-Oan sei ki’ik,’’

Sua Exa, Sekretáriadu Estadu Formasaun Profesional no Empregu (SEFOPE), Sr. Julião da Silva hateten katak modelu investimentu ne’ebé servisu sazonál sira kria, ne’e núdar modelu ida hatudu ona ba Timor-oan ne’ebé servisu iha Korea Súl, Inglaterra no nasaiun sira seluk.

“SEFOPE sei nafatin enkoraja Timor-Oan ne’ebé servisu iha rai-liur hodi fila investe iha rai-laran, ohin sira hatudu ezemplu ba servisu sazonál sira seluk tanba halibur hamutuk kapitál hodi kria servisu ba joven sira no sei dudu ita-nia kresimentu ekonomia lalais.

Sua Exa, Ministru Agrikultura no Peskas (MAP), Eng. Joaquim José Gusmão Dos Reis Martins, hateten katak hasa’e kuantidade ba produsaun agríkola iha area pekuaria no peskas núdar prioridade ‘as ba nia mandatu.

Hatutan tan katak “MAP iha polítika atu envolve setór privadu sira hodi hasa’e produsaun agrikola nian. Tanba ne’e, iha polítika foun, ami aumenta programa servisu no kolabora ho setór privadu liu-liu emprezáriu sira hodi investe maka’as nune’e ita bele responde konsume nasionál no responde nesesidade ai-han ba industria.

Presidente MAEKOM, Sr. Rui Castro hateten katak investimentu produtivu iha setór agríkola núdar alvu ida husi MAEKOM. Ami envolve Timor-Oan hotu hodi nain ba kriasaun ne’e. Ohin, ita-nia alin sira ne’ebé servisu núdar sazonál, sira mós ema ne'ebe dahuluk kolleita manu-frangu no kria mós ekipa parseiru negósiu bolu Broiler Organic Distributor.

“Ita orgullu investimentu ba kriasaun manu-frangu maioria feto sira ne’ebé fila husi servisu sazonál iha Australia. Sira husu tan pedidu atu hasa’e kuantidade manu-frangu husi 1000 ba 5000 iha fulan hirak tuirmai”, Rui hateten.  

Ohin, iha Suku Lahene Ocidental kolleita tan manu-frangu ho kuantidade 1000 ne’ebé hakiak husi pesoál Servisu Sazonál Australia nian kompostu husi membru 11, feto nain-hitu no mane nain ha’at ho naran Timor Connect Group. Grupu sei hasa’e tan kuantidade husi 1000 to’o 5000 iha fulan hirak tuir mai. Servisu Sazonál mós kria grupu parseiru negósiu naran Broiler Organic Distributor hodi sai fa’an na’in manu-frangu nian.

Presidente MAEKOM, Sr. Rui Castro enkoraja ou motiva ba Jovens sira katak “hahu Negosiu husi Ki’ik Neneik Beibeik maibe sei sai Bo’ot.

#Media_CCITL


Imprimir