Kámara Komérsiu no Indústria Timor-Leste (CCI-TL) partisipa ativamente iha Reuniaun Konsellu Konsultivu Emprezariál ASEAN (ASEAN-BAC) ba dala 104 no Sorumutu Konsellu Emprezariál Konjuntu ba dala 26, ne’ebé hala’o iha loron 21–24 Setembru 2025 iha Otél St. Regis, Kuala Lumpur, Malázia.
CCI-TL hetan reprezentasaun husi nia Vise Prezidente ba Asuntu ASEAN no OMK, Sr. Sidonio Trindade Da Costa Freitas ne’ebé hamutuk ho líder emprezariál rejionál sira hodi aborda prioridade xave sira kona-ba fasilitasaun komérsiu, kompetitividade setór privadu, investimentu, no kreximentu inkluzivu. Ajenda ne'e inklui mós Enkontru Konsellu Koordenasaun Kadeia Fornesimentu ASEAN nian ba dala uluk no Interfase ASEAN-BAC ho Ministru Ekonómiku sira ASEAN nian (AEM) iha loron 23 fulan-Setembru tinan 2025, hodi fornese plataforma ida ba diálogu diretu entre setór privadu no polítiku rejionál sira.
Liuhusi partisipasaun ne’e, CCI-TL fahe perspetiva Timor-Leste nian kona-ba dezenvolvimentu setór privadu, diversifikasaun ekonómika, no integrasaun rejionál, enkuantu hametin mós rede sira no esplora oportunidade foun sira ba kooperasaun.
CCI-TL nia envolvimentu reafirma nia papél hodi reprezenta komunidade emprezariál Timor-Leste nia lian no apoia nasaun ne’e nia dalan ba adezaun tomak ba ASEAN.
