Dili 20 Janeiru 2025- Vise Prezidente bá Assuntu Komérsiu no Indústria Sra. Kathleen Gonçalves hola parte iha enkontru dahuluk grupu traballu kona-ba asuntu foos, ne’ebé mak organiza husi Konsellu Nasionál ba Seguransa no Soberania Ai-han no Nutrisaun Timor – Leste (CONSSAN TL). Enkontru nee rasik realiza iha salaun Auditoria MCAS-Dili.
Enkontru ida nee organiza husi Konsellu Nasionál ba Seguransa no Soberania Ai-han no Nutrisaun de Timor – Leste hamutuk ho parseiru sira hodi halo koordenasaun liga ba asuntu foos haktuir ba dekretu lei númeru 9/2024 loron-13 febereiru ne’ebé regula Konsellu Nasionál ba Seguransa no Soberania Ai-han no Nutrisaun de Timor – Leste nia papel no koordenasaun sira ho parte relevante hodi hare no fo atensaun ba iha asuntu foos iha Timor-leste.
Tuir Direktur Ezekutivu CONSSAN TL, Eng. Comar Mendonça, haktuir katak enkontru dahuluk ne’ebé involve MAP (Ministru Agrikultura, Pekuária, Peska no Florestas), MCI (Ministru Komérsiu no Indústria), CLN (Sentru Lojistika Nasionál), Parseiru Dezenvolvimentu sira hanesan JICA, WFP, FAO, no CCI-TL(Câmara de Comércio e Indústria de Timor-Leste) nudar mekanismu ida hodi kria grupu traballu atu identifika, koloka idea hamutuk, no halo koordenasaun serbisu atu nune bele hetan rezultadu serbisu ida ne’ebé diak hodi resolve problema sira no dezenvolve setor agrikula liu-liu ba produsaun foos iha Timor-Leste.
Diretór nee mos haktuir tan katak, ita hotu hatene katak Kámara Komérsiu no Indústri Timor-Leste iha tinan 2024 halo ona lansamentu foos hanesan produtu rai laran ba dahuluk ho marka foos MANA BOOT, esforsu ida ne’ebé CCI-TL halo hatudu nia rezultadu ida diak tebes, foos ida diak no kualidade a’as, atu kontinua esforsu ne’ebé CCI-TL halo ona ekipa traballu ida nee presija atu koordena diak liu-tan ba oin no atu bele mos motiva parte sira seluk hodi iha hanoin no iha atensaun masimu ba asuntu foos iha Timor-Leste.
CONSSAN-TL nia papel atu bele halo nafatin koordenasaun ho parte sira hotu tantu Governu,Parseiru Dezenvolvimentu,Setor Privadu no Sosiadade Sivíl presija ita hotu atu hakas a’an hodi junta kontribuisaun liu husi idea konstrutivu sira atu nune bele kanaliza ba iha Governu hodi bele hetan atensaun masimu ba asuntu foos nee rasik no enkontru ida nee laos para iha loron ohin deit maibe sei iha nia kontinuasaun kada fulan hodi nune probelema no asuntu foos nee nafatin aktualiazadu ba ita hotu nomos ba parte Governu.
Partisipantes sira iha enkontru , ne’ebé mos maka involve iha grupu traballu ba dahuluk, maioria hato’o ba parte CONSSAN-TL katak objektivu prinsipál maka oinsa bele promove produtu doméstiku atu nune bele asegura seguransa alimentar iha Timor-leste no oinsa bele hasa’e produsaun foos no sira hotu sente onradu bele hetan konvite no bele mos involve iha grupu traballu ida nee, ho hanoin ida katak bainhira entidade hotu junta hanoin ida no objektivu ida sei garante katak asuntu foos sei bele resolve nomos bele ajuda hasa’e kresimentu ekonomia rai laran tamba nee mak grupu traballu ida nee nia papel importante mos ba oin no sei prontu atu partisipa bainhira realiza enkontru sira tuir mai, iha enkontru dahuluk ida nee grupu traballu hato’o ona ida-idak nia programa,desafiu no identifikasaun problema balun kona-ba foos nee rasik, no parte CONSSAN-TL akumula hotu informasaun sira nee no sei halo identifikasaun ba preukupasaun no sujestaun sira hodi nune iha enkotru sira tuir mai bele resposta ho programa ka atividade ruma liga ho informasaun sira mak hetan iha enkontru dahuluk husi grupu traballu ida nee.
MediaCCI-TL
