Manufahi 2 Maiu 2025, Vise-Prezidente Asuntu Agríkola, Pekuaria, Peskas no Floresta, Emprezas kiik no médiu Sr. Rui Castro hamutuk ho ekipa halo observasaun ba natar ne’ebé antes halo ona husi empreza sira ne’ebé asina ona akordu hamutuk ho Câmara de Comércio e Indústria de Timor-Leste(CCI-TL) hodi halo investimentu iha setor agrikola liu-liu iha halo natar no hasa’e produsaun hare iha Suku Betano,Postu Administrativu Same,Munisipíu Manufahi.
Husi observasaun ne’ebé halo iha fatin implementasaun iha Aldeia Bemetan,Suku Betano empreza Leadasi Unipessoal, lda, hanesan empreza ne’ebé asina ona akordu hamutuk ho CCI-TL hatudu rezultadu diak tebes no progresu to ona iha faze final no sei halo kolleta iha tempu besik. Tuir programa no metode foun ne’ebé CCI-TL hamutuk ho tékniku aplikatór sira sei halo iha faze tuir mai maka sei kuda kedas hare hafoin halo kolleta ba hare no sei hakiak mos ikan iha natar ne’ebé hahu kuda ona hare hodi nune bainhira kolleta hare epoka daruak nian bele mos kolleta ikan tuir metodu foun ne’ebé CCI-TL sei utiliza iha natar sira.
Vise-Prezidente Asuntu Agríkola, Pekuaria, Peskas no Floresta, Emprezas kiik no médiu Sr. Rui Castro mos halo sorumutu ho komunidade iha Postu Administrativu Fatuberlihu, Munisipíu Manufahi iha Suku Fatukahi no Caicasa, no Komunidade husi Suku Besusu,Postu Administrativu Alas, ne’ebé natar nain sira interesante ho metodolozia foun ne’ebé CCI-TL sei utiliza hodi nune suku tolu nee sei oferes rai hamutuk ektare 15 (sanulu resin lima) hodi bele utiliza ba halo natar haktuir ba programa CCI-TL nian ne’ebé sei kuda hare ho metodu custo halo natar baratu,uza audubu organíku,uza trator iha faze inisiu no faze sira tuir mai sei la utiliza trator no metodu sira seluk ne’ebé hafasil tebes empreza agrikola sira nia serbisu iha natar.
Hare ba metodolozia ne’ebé CCI-TL aprezenta ba natar nain no empreza mikro kiik no médiu sira prontu atu oferese sira nia rai no serbisu hamutuk ho CCI-TL hodi halo natar no hasae Produsaun ba hare. Tamba nee iha mos Postu Administrativu Same, Munisipíu Manufahi komunidade husi Suku Betano hamutuk ho Xefe Suku Betano entusias no kontenti ho programa ida nee no prontu koopera ho CCI-TL tamba tuir komunidade balun deklara katak sira hare ona progresu ne’ebé empreza Leadasi Unipessoal Lda implementa ho programa CCI-TL nian hatudu rezultadu ida diak tebes tamba iha faze tuir mai sira hakarak tebes koopera ho CCI-TL. Nunemos natar nain sira husi Suku Tutuluro prontu oferese sira nia rai besik ektare (60) hodi oferese ba halo natar ne’ebé sei koopera ho CCI-TL liu-hosi metodu foun ne’ebé CCI-TL sei implementa. Husi rai ektar (60) ne’ebé komunidade suku Tutuluro oferese sei utiliza ba mos Sentru ba Produsaun fini ba hare, fini batar hibrida KD01 ho KD02 no sentru plantasaun no produsaun adubo no pestisida organik ne’ebé mak sei halo husi ekipa tékniku CCI-TL nian.
Programa investimentu setor agrikola iha halo natar husi empreza mikro kiik no médiu sira hahu lao ona iha Munisipíu Manufahi ne’ebé kolokadu iha Postu Administrativu Fatuberlihu iha Suku Fatukahi ho medida natar ektare tolu (3) no iha Postu Administrativu Same iha Suku Betano ho media natar hamutuk ektare rua (2) ne’ebé iha suku Betano mak sei dahuluk halo kolleta ba hare tamba iha ona faze final no iha epoka tuir mai depois halo tia kolleta ba hare sei kuda kedas hare fini foun epoka daruak no hakiak mos ikan iha kedas natar ne’ebé hahu kuda hare epoka daruak iha Aldeia Bemetan,Suku Betano,Postu Administrativu Same,Munisipíu Manufahi ne’ebé mak sei implementa no kontinua investe husi empreza Leadasi unipessoal,Lda koopera hamutuk ho CCI-TL.
#mediaCCI
