Loron 31 Janeiru 2025, Ministru Komérsiu no Indústria hamutuk ho Diretór Jerál, Diretór Nasionál no Asesór Prinsipál sira vizita eskritóriu CCI-TL Nasionál ne’ebé simu husi Vise Prezidente CCI-TL, Prezidente CCI-TL Munisipíu Sira, Diretór Ezekutivu, Koordenador nomos funsionáriu Sekretáriadu CCI-TL Nasional, iha ACait Dili.
Reprezenta Prezidente CCI-TL Sra, Hergui Luina Fernandes Alves nudar mós Vice Prezidente CCI-TL Asuntu Promosaun no Kooperasaun hato’o agradesementu ba Exelénsia Ministru Komérsiu no Indústria Sr. Nino Pereira ho nia estrutura tomak ba dahuluk vizita ofisiál mai iha eskritória CCI-TL Nasionál. Sr. Prezidente CCI-TL delega hela ami Vice nain hira atu simu Sr. Ministru iha CCI-TL hodi rona hanoin ka programa ruma ne’ebé Sr. Ministru hakarak hato’o no rona husi parte CCI-TL, vizita ida nee hanesan ksolok boot mai CCI-TL tamba setor privadu hanesan parseiru governu nian presija dunik iha atensaun hodi nune hamutuk ita bele koopera iha serbisu sira ligadu ho papel Ministériu Komérsiu no Indústria liga mos ho papel setor privadu sira ne’ebé hamahon a’an iha CCI-TL.
Entertantu Ministru Komérsiu no Industria IX Governu Konstitusional Sr. Nino Pereira iha nia intervensaun hato’o katak, Ministériu ne’ebé nia lidera presija iha kooperasaun ho seitór privadu sira liu-liu setor privadu nasionál husi kategoria mikro empreza kiik, médiu no grande empreza sira. Intensaun vizita ida nee, hau hamutuk ho estrutura Ministériu Komérsiu no Indústria deside tenki mai iha nee hodi hatutan no rona opiniaun sira liga ba programa Ministériu Komérsiu no Indústria nian ne’ebé sei realiza iha tinan ida nee maka Dili International Expo ne’ebé nia programa prinispál tolu mak hanesan, Feira produtu lokál, programa talk show sei involve seitor privadu sira nomos programa business coaching. Hare ba programa ida nee relevante tebes ho papel CCI-TL nian no setor privadu sira tamba nee maka ohin ami mai hodi rona ita boot sira nia opiniaun nomos husu ita boot sira nia partisipasaun iha programa ida nee.
Sr. Ministru Komérsiu no Indústria nee mos hatutan liu-tan katak, nia sente onradu tebes bele hasoru estrutura CCI-TL ba loron ida ohin, tamba ho prezensa ita boot sira nian iha sorumutu ida nee sei fo mos mai Ministériu Komérsiu no Indústria idea no hanoin diak sira kona-ba programa ne’ebé maka Ministériu Komérsiu no Indústria sei realiza iha tinan ida nee. Setor privadu nia papel importante tebes,liu-liu parte CCI-TL durante nee promove tebes ita nia produtu lokál sira hanesan ezemplu susesu ne’eb’e maka CCI-TL halo ona maka konsege produz foos ho marka MANA BOOT, tamba nee atu halo sucesso ba eventu boot ida nee Ministériu Komérsiu no Indústria presija dunik apoiu husi setor privadu liu husi kordenasaun direta ho parte CCI-TL.
Iha diskusaun ba programa Dili International Expo, husi parte CCI-TL konkorda atu apoia ba programa ida nee, CCI-TL fo ninia rekomendasaun balun ba iha Ministériu Komérsiu no Indústria katak antes atu implementa programa ida nee presija iha diskusaun didiak tamba programa ida nee involve setor privadu liu husi Kámara Komérsiu Munisipíu ida-idak husi Nasionál to ba iha Munisipíu sira no parte CCI-TL nia hakarak husi implementasaun eventu hanesan Dili International Expo tenki lori nia benefisu diak ba setor privadu sira liu husi promosaun ba produtu sira mak sei aprezenta perante realizasaun expo nee rasik. Tamba tuir CCI-TL setor privadu hasoru hela desafiu barak kona-ba asuntu sira mak sai hela bareira ba setor privadu sira hodi impede atividade komérsial iha rai laran nomos ambiente negósiu ne’ebé hamutuk ita presija hadia hodi kria ambiente ida ne’ebé diak hodi halo atividade negósiu ida ne’ebé diak iha Timor-Leste.
Tamba nee maka CCI-TL prontu iha kualker tempu bainhira Ministériu Komérsiu no Indústria presija atu rona hanoin sira no involvementu direta iha programa ida nee CCI-TL preparadu, no husi esperensia sira mak antes nee CCI-TL hala’o ona fiar katak CCI-TL sei bele ajuda Ministériu Komérsiu no Indústria hodi realiza programa ida tuir planu ministériu nian.
Hatan ba hanoin sira mak parta Kámara Komérsiu no Indústria Timor-Leste hato’o, Sr. Ministru Komérsiu no Indústria konsidera katak presija dunik iha diskusaun klean liu tan hodi nune bele implementa progama expo ne’e ho diak no sucessu. Sr. Ministru nee mos hato’o katak ita presija iha sinerjia iha ita nia kooperasaun laos deit ba programa expo nee maibe oinsa ita bele hadiak ita nia ekonomia nee mak sai asuntu prinsipál liu.
Vizita Ministru Komérsiu no Industria hamutuk ho nia kometiva mai iha CCI-TL laos deit koalia kona-ba programa Dili International Expo, maibe rona no responde mos ba asuntu importante sira mak sai desafiu no impedementu ba setor privadu sira durante nee, tuir Ministru Komérsiu no Industria ho politika IX Governu nian atu implemeta programa kréditu saúdavel ba empreza mikro kiik, média no grande empreza sira nee hanesan meus ida presija dunik atu implementa hodi resforsa diak liu-tan ita nia empreza sira. Husi ekipa tékniku Ministériu Komérsiu no Industria nian mos mai ona iha CCI-TL hodi koalia asuntu kréditu saúdavel nee no husi parte Ministériu Komérsiu no Industria rona ona sujestaun no opiniaun sira mak setor privadu sira hakarak tamba nee bainhira programa nee implementa ita hatene ona oinsa bele implementa no ninia tarjetu ba ida ne’ebe. Ministru Komérsiu no Industria mos agradese husi vizita ida nee konsege rona informasaun barak mak setor privadu hato’o no Ministru hamutuk ho nia estrutura sei konsidera no rekoñese katak papel setor privadu liu husi CCI-TL importante tebes tamba nee liña kordenasaun ba serbisu hamutuk Ministeriu Komérsiu no Industria no CCI-Tl sei kontinua ho objektivu ida katak oinsa bele reforsa setor privadu rai laran iha aspektu hotu atu nune ita nia rain bele moris iha prósperadu no ekonomia ida ida ne’eb’e diak no sustanbilidade bai ha futuru.
MediaCCI-TL
