Dili 24 marsu 2025, Câmara de Comércio e Indústria de Timor-Leste (CCI-TL) no SERVE-ip, realiza sorumutu hodi koalia kona-ba kooperasaun serbisu entre instituisaun rua kona-ba rekolla dadus empreza sira maka rezistu ona iha Serve nomos empreza sira ne’ebé mak CCI-TL halo levantamentu ba sira nia atividade. Sorumutu nee hala’o iha gabinete Prezidente CCI-TL Acait,Dili.
CCI-TL iha Dezembru 2024 lansa ona baze de dadus hodi halo levantamentu ba empreza hira mak eziste iha Timor-leste, empreza nasional no internasional nunemos baze de dadus ne’ebé CCI-TL iha halo mos rekollamentu ba dadus empreza hira mak ativu no hira mak la ativu. Iha levantamentu ne’ebé CCI-TL hala’o ba dahuluk iha munisipíu Dili ne’ebé dadus provizória CCI-TL hetan husi ekipa levantamentu hamutuk rihun ida resin ona no tarjetu ba fulan Abril 2025 sei termina iha munisipíu Dili no kontinua ba iha munisipíu sira seluk.
Hare ba atividade ida nee SERVE-ip ne’ebé assume funsaun hanesan instituisaun públika ida ne’ebé toma konta ba rezistu emprezárial hakarak halo kooperasaun serbisu hamutuk ho CCI-TL hodi nune instituisaun rua bele iha dadus no hatutan dadus ba malun bainhira presija tuir nesisidade ne’ebé instituisaun rua presija ba iha rejistu empreza no levantamentu dadus empreza nomos bele serbisu hamutuk hodi fiskaliza no kontrolu ba ezisténsia empreza sira iha Timor-Leste tuir ida-idak nia kompetensia.
Iha intervensaun ba dahuluk Diretór Ezekutivu SERVE-ip Sr. Fausto Soares Dias hato’o katak, husi SERVE-ip hakarak tebes halo nota entedementu kooperasaun serbisu entre instituisaun rua hodi nune ba-oin bele serbisu hamutuk iha atividade rejistu no levantamentu dadus ida ne’ebé kompletu no halo husi instituisaun rua, tamba nee oportunidade ida ohin mai ho ekipa tékniku sira atu aprezenta ba Sr. Prezidente CCI-TL no estrutura CCI-TL kona-ba progresu serbisu balun maka SERVE-ip komesa dezenvolve hodi nune bele hafasil bainhira buka dadus empreza sira no Sistema serbisu registu emprezarial bele digitalizadu diak liu-tan. Diretór Ezekutivu nee mos akresenta liu-tan katak agradese bele mai hasoru diretamente Sr. Prezidente no estrutura CCI-TL no SERVE-ip nakloke ba CCI-TL bainhira presija atu hetan dadus ruma liu-liu kona-ba ezisténsia empresa sira iha Timor-Leste tamba hare ba kompeténsia CCI-TL nian presija dunik iha kooperasaun entre parte rua.
Iha fatin hanesan Prezidente CCI-TL Sr. Jorge Manuel de Araújo Serrano mos hato’o nia agradesementu ba Diretór Ezekutivu SERVE-ip ho nia ekipa tékniku sira bele to mai iha CCI-TL hodi bele realiza sorumutu ida ba loron ohin, CCI-TL iha ona hanoin atu ba to iha SERVE-ip atu koalia asuntu sira mak hanesan ohin Diretór Ezekutivu SERVE-ip hato’o no ohin ita boot rasik to iha nee no ami agradese tebes. Los dunik CCI-TL halo ona levantamentu dadus ba empreza iha Timor-Leste no agora hahu lao iha Munisipíu Dili no sei to iha Munisipíu sira seluk, atividade levantamentu dadus nee CCI-TL hetan apoiu fundus husi S.E Vise Primeiru Ministru no Ministru Koordenador Asuntu Ekonomia no Ambiente Sr. Kalbuady Lay hodi hari sistema baze de dadus ne’ebé lansa ona iha Dezembru 2024 no agora ekipa tékniku sira halo hela levantamentu dadus iha terrenu.
Oportunidade diak tebes ekipa SERVE-ip bele mai iha CCI-TL hodi ita bele hatutan ba malun nesisidade serbisu sira mak kabe ba instituisaun rua, ami halo levantamentu dadus sempre hasoru desafiu balun ezemplu bainhira tékniku sira ba registu empreza sira nia atividade negósiu sira sempre halo reklamasaun no protesta katak empreza rezistu ona iha SERVE-ip tambasa mak sei nafatin mai rejistu tan. Problema ida nee ekipa hasoru iha terrenu bainhira halo levantamentu no ekipa sempre fo espelikasaun katak serbisu SERVE-ip nian rejistu ita boot sira nia empreza no kona-ba levantamentu ne’ebé CCI-TL halo atu hodi hatene total empreza hira mak ativu, hira mak la ativu, fo empregu ema nain hira, empreza nain nee se, no empreza nee nia dokumentus iha ka lae no rekezitu sira seluk mak empreza sira iha haktuir ba regras rezistu emprezial nian iha Timor-Leste. Husi levantamentu dadus ne’ebé CCI-TL halo hasoru desfaiu balun nomos identifikasaun problema balun maka presija atu kolabora ho SERVE-ip hodi hare hamutuk ba asuntu sira mak sai desafiu durante ekipa tékniku sira ba halo levantamentu iha terrenu.
Sorumutu entre parte rua CCI-TL no SERVE-ip partisipa husi Prezidente CCI-TL,Vise Prezidente CCI-TL Asuntu Promosaun no Kooperasaun, Diretór Ezekutivu CCI-TL no Diretór Ezekutivu SERVE-ip hamutuk ho nia ekipa tékniku sira.
#mediaccitl
