CCI-TL no SEkoop Hametin Kooperasaun Servisu Liu-Husi Asina Memorandu Entendimentu

Dili, 7 Outubru 2025, Câmara de Comércio e Indústria de Timor-Leste (CCI-TL) no Secretário de Estado das Cooperativas (SEkoop) realiza nota entedimentu hodi hametin koordenasaun servisu entre CCI-TL no SEkoop ba programa importante sira maka deside iha memorandu entendimentu ne’ebé parte rua sei implementa no liu-liu oinsa bele hasai setor produtiva sira iha Timor-leste. Assinatura memorandu entedimentu nee hala’o husi Prezidente CCI-TL Sr. Jorge Manuel de Araújo Serrano no Sekretáriu Estadu Kooperativa, Sr. Arsenio Pereira da Silva, akompaña no asiste husi Vise Prezidente CCI-TL sira nomos Estrutura SEkoop, ne’ebé hala’o iha sala enkontru SEkoop Acait,Dili.

Objetivu husi asina memorandu entedimentu ida nee maka oinsa parte rua bele servisu hamutuk hodi hasa’e produsaun ba setor produtivu sira nomos objetivu prinsipal liu maka, Promove polítika no regulamentu sira ne’ebé fó apoiu ba negósiu kooperativu sira, Fasilita inisiativas kapasitasaun ba emprezas kooperativas, Hadi’a asesu ba rekursu finanseiru no oportunidade merkadu ba kooperativa sira, Enkoraja parseria públiku-privadu iha dezenvolvimentu kooperativu no Hametin esforsu advokasia hodi hadia enkuadramentu legal no institusional nebe regula kooperativas.

Iha intervensaun Prezidente CCI-TL,Sr. Jorge Manuel de Araújo Serrano hato’o katak, CCI-TL hanesan parseriu estratéziku governu nian ne’ebé durante ne’e fo apoiu ba governu hodi oinsa bele ajuda nomos kontribui ba iha dezenvolvimentu nasionál nomos dezenvolvimentu ekonomiku iha ita nia rain ne’ebé integra iha programa XI Governu Konstitusional nian nunemos hamutuk halo akompañamentu ba programa ministériu hotu-hotu liga ho atividade ekonomiku. Ita hotu hatene katak SEkoop iha papel ida importante tebes, iha surumutu no enkontru ho Sr. Sekratáriu Estadu sempre iha diskusaun ba asuntu importante sira no ohin to dunik iha akordu ida nee, ohin realiza memorandu entendimentu ida hanesan inisíu kooperasaun entre CCI-TL no SEkoop ba oin sei iha kooperasaun ida metin liu ne’ebé ita sei konkorda atu realiza kontratu ba kada programa liu-liu liga ho setor kooperativas nomós setor produtivu sira seluk. Iha fatin hanesan Prezidente CCI-TL mos akresenta liu-tan katak, dalabarak ita halo parseria no servisu ho parseru internasional sira maibe dalabarak mos parseria ida nee hanesan deit objetu no dalaruma mos sai fali projeitu, ho nune maka agora tempu ona ba ita atu deside hala’o kooperasaun servisu entre ita hodi bele fo liman ba malun. SEkoop no governu iha knár tomak atu halo politika hodi hatur dezenvolvimentu ba ita nia rain no CCI-TL prontu atu ezekuta ba programa no politika sira maka governu deside.

Iha fatin hanesan mos, Sekratáriu Estadu Kooperativa, Sr. Arsenio Pereira da Silva iha ninia intervensaun hat’o katak, ohin realiza asinatura ba memorandu entedimentu ne’ebé bele lori ita ba saida mak ita hakarak liu-liu oinsa bele dezenvolve ita nia rain ida nee. Ohin halo memorandu ida nee no konkorda katak ba oin bainhira iha kontratu ruma sei halo mos akordu ba kada kooperasaun sira mak CCI-TL no SEkoop hala’o nomos rekomenda katak sei halo mos akordu tripartida ne’ebé sei involve setor públiku, setor privadu nomos movimentu kooperativa sira, tambá deside mos iha politika XI governu konstitusional nian. Ho ida nee mak ba oin sei hala’o kooperasaun sira nee atu nune bele iha envolvimentu inklusivu ba ita nia dezenvolvimentu liu-liu iha setor ekonomia.

Asinatura memorandu entidementu nee hala’o iha ámbitu kooperasaun ida diak tebes entre parte rua, no iha memorandu nee sita kooperasaun importante sira maka sei implmenta husi parte rua ba iha futuru, Memorandu ida-ne’e mos estabelese mekanizmu institusionál ida ba kooperasaun no kolaborasaun kona-ba asuntu sira ne’ebé relasiona ho atividade sira hosi Parte sira, partikularmente iha promosaun no hametin empreza kooperativa sira, hadi’a kreximentu ekonómiku no kria ambiente negósiu ne’ebé favoravel ba kooperativa sira.

Remata