Maluk membru CCI-TL, emprezariu no parseiru sira hotu,
Ho onra no ksolok mak atan ha’u husik lia menon ida ne’e atu komemora tinan rua mandatu estrutura ida ne’e nian. Iha biban kmanek ida ne’e, ha’u hakarak ho laran tomak no hakraik an atu agradese bá hotu hotu nia tulun material, finanseiru, moral no polítika hodi bele hametin no Habo’ot liu tan instituisaun ida ne’e iha ita nia rai doben Timor-Leste.
Hau nia agradesimentu as ba órgaun sira Estadu nian hanesan Presidente da República no Parlamento Nacional, bá apoiu polítiku tomak. Agradesimentu espesial bá IX Governu konstitusional lideradu husi Maun Boot Kay Rala Xanana Gusmão ne’ebé mak sai hanesa parseiru ida besik liu no estratéjiku iha ita nia inisitiva sira. Agradese bo’ot tebes bá membru honoráriu sira, parseiru nasional no internasionál sira, estrutura no membru Asosiasaun no koperativa fundador no efetivu sira no estrutura tomak CCI-TL nian iha nasional to iha Munisípiu sira no RAEOA.
Iha tinan kotuk, ita tau prioridade bá konsolidasaun CCI-TL nian, ita hasoru dezafiu balun ne’ebé mak halo atrasu programa ida ne’e maibe ho esforsu tomak ita bele alkansa dadauk ona.
Tinan ida ne’e ita tama iha tinan asaun nian hodi bele tulun sector privadu nia inisitiva sira atu hare’e liu bá sektor produtivu sira, nune’e bele hadia ita nia ekononia rai laran, kore an husi depensia bá importasaun produtu aihan balun no hasa’e empregu iha ita nia rain. Asaun balun ne’ebé ita halo dadauk hanesan:
Produsaun no lansamentu produtu nasional (fos lokal).
Akompaña Governu iha prosu adezaun formal bá Organizasaun Mundial Komérsiu (OMK).
Partisipa no tuir diskusaun sira atu tama membru planu ASEAN, liu liu CCI-TL hola parte iha ASEAN BUSINESS ADVISORY COUNCIL (ABAC).
Elabora planu asaun ne’ebé sei aprezenta bá IX Governu hodi bele hetan parseria ida metin no diak liu iha sektor sira ne’ebé importante atu hadia ambiente negosiu no hasa’e ekonomia rai laran.
Prepara dekretu lei ne’ebé atu reforsa existensia CCI-TL hodi substitui rezolusaun governu Nu. 17/2012, 13 Juñu ne’ebé aprova iha Konsellu Ministru hodi rekoñese Kámara Komérsiu no Indústria Timor-Leste.
Lansamentu base bá dadus hodi rejistu atividade negosiu sira nian, iha territoriu laran tomak ne’ebé sai hanesa ferramenta ida importante tebes.
Lansamentu website ofisial CCI-TL nian ne’ebé bele sai mós pájina ida hodi promove atividade no kontaktu membru sira nian.
Preparasaun bá formasaun emprezáriu sira no mós kolaborador ka staff sira, iha ona akordu ida ho assinatura memorandu entendimentu ho instituisaun portugés balun iha Portugal bá establese eskola bá negosiu no formasaun profissional.
Ba asaun sira temi iha leten advokasia bá membru no emprezariu sira no mós kontaktu sira halo nafatin nu’udar mós kna’ar iha importante CCI-TL nian.
Hau enkoraja maluk emprezariu sira hotu atu partisipa ativu liu tan iha enkontru no atividade hotu ne’ebé CCI-TL organiza.
Negosiu ita ida idak nian no kompetisaun ida saudável mak dalan los negosiu nian, maibé ambiente no oportunidade ne’ebé diak mak fo vantagem bá ita nia negosiu, bá ida ne’e presija Ita hotu nia partisipasaun no kolaborasaun liu husi organizasaun ida. Ita hotu hamutuk bele kria kondisaun favorável bá kresimentu no susesu ita nian.
Apresia no agradese bá ita bo’ot sira hotu nia konfiansa.
Dili,16 Novembru 2024
Jorge Manuel de Araújo Serrano
Prezidente CCI-TL
