Ho satisfasaun no onra bo’ot, hato’o bá ita-bo’ot sira hotu ho pozisaun hanesan Prezidente Câmara de Comércio e Indústria de Timor-Leste (CCI-TL) ha’u nia obrigadu wain bá apoiu tomak hosi Governu, Ajensia Internasional no Parseiru Internasional sira, Membru Onoráriu hotu, Assosiasaun Emprezarial no Kooperativa sira, Estrutura Câmara de Comércio e Indústria de Timor-Leste (CCI-TL) hosi nasional to munisípiu sira nomós RAEOA iha mandatu tinan ida ne’e.
Tinan ida ne’e ho dezafiu bo’ot hahu hosi konsolidasaun ita nia Câmara de Comercio e Indústria de Timor-Leste (CCI-TL) iha Municípiu sira no RAEOA, hametin Assosiasaun emprezarial hotu ne’ebé hamahan-aan iha Câmara de Comércio e Indústria de Timor-Leste (CCI-TL) hodi fo imajem foun no konfiansa bá CCI-TL.
Câmara de Comércio e Indústria de Timor-Leste (CCI-TL) organizasaun ne'ebé reprezenta Setór Privadu buka promove no fasilita kresimentu bá komérsiu no indústria iha teritóriu Timor-Leste. Objetivu prinsipál CCI-TL nian mak atu tau-matan bá autor ekonomiku sira, suporta setór privadu iha investimentu, hasa’e Produsaun iha rai laran, kontribui no hasa’e empregu, promove parseria komérsiu, iha nivel nasionál no internasionál.
Iha tinan ida ne’e nia laran, ita servisu ho esforsu makas atu kria ambiente favorável bá negósiu, oferese servisu ho kualidade, hahú inovasaun no promove kapasitasaun bá empresáriu lokál. ho programa treinamentu, semináriu no workshop, ita kompremetidu atu kapasita membru sira no fornese ferramenta sira ne'ebé presiza atu hetan suksesu iha merkadu nacional no mós iha futuru iha merkadu globál ne'ebé kompetitivu liu tan.
Iha parte seluk, CCI-TL desempeña papel fundamentál iha defesa bá interese membru sira nian liga bá governu no instituisaun relevante sira seluk. Ita servisu hamutuk ho governu no autoridade sira hodi dezenvolve polítika komérsiu favorável, reduz bárreira komérsiu no promove transparénsia no ambiente negósiu ne'ebé saudável.
Ita hanoin katak ho kolaborasaun ativa ho organizasaun empresarial nasionál no internasionál sira, ita bele konstrui ekonomia ne'ebé prósperu no sustentável iha Timor-Leste, ho inovasaun, diversifikasaun ekonómika no investimentu estratéjiku nu’udar motór.
Tambá ne'e lori CCI-TL nia naran hau konvida, empresáriu, inisiadór no investidór sira hotu iha Timor-Leste atu ita hotu hamutuk iha jornada bá dezenvolvimentu ekonómiku Timor-Leste nian. CCI-TL iha atu suporta ita hotu, orienta ita hotu, kria oportunidade “networking” no promove kresimentu bá negósiu ita hotu nian.
Jorge Manuel de Araújo Serrano
Prezidente CCI-TL
