CCI-TL Entrega Relatóriu Introdús Teknolojia no Métodu Modernu Atu Hasa’e Produsaun Foos iha Timor-Leste ba Primeiru Ministru.

Dili, 22 maiu 2025, Iha ámbitu komemorasaun aniversáriu Câmara de Comércio e Indústria de Timor-Leste (CCI-TL) ba dala-15 ne’ebé hala’o iha salaun CNE Dili, Prezidente CCI-TL Jorge Manuel de Araújo Serrano hamtuk ho Vise-Prezidente Asuntu Agríkola, Pekuaria, Peskas no Floresta, Emprezas kiik no médiu,Rui Castro entrega Relatóriu Introdús Teknolojia no Métodu Modernu Atu Hasa’e Produsaun Foos iha Timor-Leste, ba Primeiru Ministru IX Governu Konstitusional Maun Boot Kay Rala Xanan Gusmão iha salaun CNE Dili.

Relatóriu Introdús Teknolojia no Métodu Modernu Atu Hasa’e Produsaun Foos iha Timor-Leste hanesan mos dokumentu ida hodi hatudu progresu importante no susesu sira hosi programa Demo Plot ne'ebé hala’o iha Timor-Leste, Programa Demo Plot ida-ne’e reprezenta kompromisu atu hasa’e produtividade agrikultura no asegura seguransa alimentár, ne'ebé hanesan fundasaun importante ba futuru Timor-Leste. Liuhosi introdusaun variedade hare foun ne'ebé produtivu no prátika agrikultura sustentável, hodi tulun agrikultór sira atu utiliza kapasidade ne’ebé sira iha ona ho efikás liu-tán. Programa ida-ne’e la'ós de’it atu aumenta produsaun, maibé mós muda agrikultór sira-nia moris, hasa’e reziliénsia ekonomia iha komunidade, no harii sistema agrikultura ida-ne’ebé sustentável ba jerasaun sira iha tempu oin-mai.

Atu fo hanoin hikas katak, husi rezultadu Demo Plot ne’ebé CCI-TL implementa durante tinan 2024 hatudu rezultadu diak tebes, CCI-TL hamosu kedas marka foos ho naran “Mana Boot” uza foos rai origin husi Povo Agrikultur sira iha Timor-leste no agora dadauk entrega ba empreza hodi halo komersializasaun maibe nafatin haktuir ba padraun CCI-TL nian katak foos marka Mana Boot so bele fan ba públiku husi foos rai original Timor-Leste nian.

Husi programa Demo Plot CCI-TL konsege hasae kuantidade foos ne’ebé maka antes agrikultur sira halo natar ho rezultadu kada ektare hetan deit tonelada (2) ka (3) maibe ho Demo Plot ne’ebe CCI-TL implementa bele hetan kuantidade boot liu-hosi kada ektare bele fo kuantidade tonelada 5 no bele to 8. Husi rezultadu Demo Plot nee mos, iha loron 7 fulan janeiru 2025, CCI-TL halo ona akordu investimentu hamutuk ho empreza (17) husi Munisipíu Lautem,Baucau,Viqueque,Manufahi,Maliana no RAEOA hodi halo investimentu iha setor agrikola liu-hosi apoiu CCI-TL nian ne’ebé finansía hosi Ministériu Koordenadór Asuntu Ekonomia (MKAE). Husi akordu investimentu nee empreza balun hahu kolleita ona hanesan foin dadaun iha loron 19 maiu 2025 hahu kolleita ona iha Betano,Postu Same,Munisipiu Manufahi no sei kontinua kolleita iha Munisipiu Baucau no Maliana iha fulan Maiu no Juño 2025, hafoin kolleita CCI-TL mai mos ho metodolojia foun ida ho naran halo “Natar Baratu” ne’ebé koa hare, kuda kedas hare no hakiak mos ikan, no periódu ba kuda hare no hakiak ikan tarde liu fulan-4 bele halo kolleita ba hare nomos ikan iha fatin hanesan ka iha natar laran.

MediaCCI-TL