Dili, 14 Jullu 2025, Câmara de Comércio e Indústria de Timor-Leste hamutuk ho Servisu Registu no Verifikasaun Emprezárial SERVE,I.P nomos Kalohan Hosting Net, hahu hikas levantamentu nasional ba dadus emprezarial iha kapitál Dili.
Levantamentu dadus emprezárial hahu ona iha fulan Novembru 2024 to iha Marsu 2025 ho dadus ne’ebé rekolla ona hamutuk 1074 empreza ne’ebé verifikadu hala’o atividade negósiu iha Timor-Leste liu-liu iha kapitál Dili. Hosi dadus empreza 1074 ne’ebé verifikadu identifika katak empreza ativu hamutuk 1072, nain ba empreza Timor oan hamutuk 473, estranjeirus 544, no detallu kona-ba ezisténsia empreza sira nian koloka ona iha baze dadus CCI-TL nian no sei relata nia relatóriu kompleitu ho deskrisaun kada empreza fo serbisu ema nain hira, feto hira no mane hira sei espelika detallu iha Sistema baze dadus inklui mos mapa fatin negósiu kada empreza ida-dak ne’ebé verifikadu ona.
Levantamentu ne’ebé hala’o iha fulan Novembru 2024 to iha Marsu 2025 la konsege kontinua tamba iha asuntu tékniku balun maka presija hadia entre CCI-TL nomos empreza ne’ebé CCI-TL fo fiar hodi halo jestaun ba servisu levantamentu nee, iha mos problema balun mak ekipa levantamentu hasoru tamba laiha kooperasaun diak hosi empreza sira mak eziste no registradu ona iha SERVE,I.P. Ho nune maka iha loron 27 marsu 2025 CCI-TL hamutuk ho SERVE,I.P halo memorandu entendimentu ida hodi deside serbisu hamutuk iha prosesu levantamentu ida nee.
Objektivu ba assina MoU ida ne’e maka atu estabelese servisu-hamutuk ida entre SERVE-I.P по CCI-TL ba realizasaun levantamentu nasional ba dadus emprezariál nian, hametin liu-tan kooperasaun entre instituisaun rua CCI-TL no SERVE-IP I.P Hodi servisu hamutuk, atu bele rekolla dadus emprezarial nian hodi fasilita diak liu tan prosesu rejistu emprezarial iha plataforma baze de dadus CCI-TL nian atu bele efetivu liu tan.
Iha re-lansamentu levantamentu nasional dadus emprezarial Tuir vise prezidente CCI-TL Eng. Rui Castro, reprezenta Prezidente CCI-TL hato’o ba ekipa enumerador sira katak, Prosesu levantamentu nee lao ona maibe ita hasoru desafiu balun espera ho kooperasaun serbisu entre CCI-TL no SERVE,I.P bele hafasil diak liu-tan empreza Kalohan nia serbisu hodi halo registu ba empreza sira, normalmente prosesu ida la fasil ita sempre hasoru desafiu oi’oin maibe labele hakiduk nafatin lao tamba buat sira hanesan nee so Ita Timor-Oan mak bele halo labele fo oportunidade atu ema estranjeirus maka mai halo jestaun sira nune. Prosesu ida nee lao ona, iha failla oituan mais laos totalmente hosi failla ne’ebé iha ita identifika ona saida mak presija hadia hodi levantamentu dadus emprezárial ne’e bele rekolla ho didiak. Fiar katak ho MoU ne’ebé CCI-TL halo ho SERVE,I.P sai forsa rua ne’ebé junta hamutuk hodi bele fo apoiu ba Kalohan hosting hodi bele halo jestaun diak ba levantamentu dadus emprezárial ne’ebé ohin ita hahu lao hikas.
Iha fatin hanesan Diretór Interinu SERVE,IP Sr. Raul Sanches Lajes, hato’o katak, ba maluk emrpezariu hotu iha Timor-Laran no maluk estranjeiru sira ne’ebé mak hala’o sira nia atividade iha parte ne’ebe mak tama iha kategoria ka tipu Unipesoal Limitada, Sosiedade Anonimu no Reprezentasaun Permanente sira iha Timor – Laran, atu hato’o hela hau nia mensajem katak husu para maluk emprezarial sira hotu atu koopera ho ekipa rua ne’ebe mak husi Ekipa SERVE IP rasik ho Ekipa Kalohan atu fo ita boot sira nia dokumentus sira hanesan Sertidaun Rejistu Komersial, Autorijasaun Ejersisiu Ka Deklarasaun Previa Sujeta Ka Não Sujeta no ita bo’ot sira nia Estatutu ba iha ekipa enumerador SERVE,I.P no Kalohan Hosting atu nune’e bele rejistu ba iha leventamentu de dadus refere.
Ba maluk emprezarial sira ne’ebé mak la koopera hakarak hato’o hela katak tuir ita nia dekretu Lei no. 83/2022 iha artigu 26 katak se mak la koopera ita sei fo multa ka koima maibe atu hateten dehan katak SERVE,I.P no Kalohan Hosting laos atu ba julga ita bo’ot sira mais atu hatene ezisténsia kompañia ita-boot sira nian sei ejiti ka la ejisti entaun ida ne’emak ekipa rua ne’e atu halo levantementu de dadus laos atu halo inspesaun ka atu halo visturia ba ita bo’ot sira nia kompañia maibe atu hatene deit situasaun, kondisaun empreza refere. Tamba tuir vizaun no misaun SERVE IP nian katak SERVE I.P. sai hanesan instituisaun públiku ida ne’ebe mak buka atu servi deit ba iha seitor privadu, entaun mensajem ida ne’e mak parte SERVE I.P. hato’o hela ba maluk emrprezarial sira. Hanesan ohin hau dehan tena katak liu-liu ba iha advogadu sira no azénsia ba trata dokumentus sira ne’ebé mak rai hela karik dokumentus emprezas sira nian halo favor ita bo’ot sira tenki koopera ho ekipa ida ne’e.
Vise Prezidente CCI-TL asuntu Fortalesimentu Feto Emprezária, Sra. Jacinta Abu Cau Pereira hato’o mos mensajen ba emprezáriu sira katak, husu atu emprezáriu sira iha teritoriu Timor laran tomak atu bele koopera ho ekipa levantamentu dadus empresa hodi fó ita-boot sira nia dadus empreza nian hodi bele harii ita nia baze dadus ida ne’ebé atualizadu, levantamentu nasional dadus emprezárial ida nee hetan apoiu hosi MKAE Ministru Koordenador Asuntu Ekonómiku, ne’ebé maka apoiu fundus ba prosesu levantamentu ida nee no dadus ne’eb’e mak atualizadu sei relata mos ba iha Governu atu hodi bele ajuda bainhira halo planu ruma haktuir ba dadus, tamba nee maka husu ba maluk emprezárius sira atu kontribui ho ekipa levantamentu ne’ebé maka sei ba iha ita boot sira nia fatin.
Iha loron 14 Jullu 2025, ekipa enumerador sira hahu kedas registu ba iha empreza Heranty Motor iha Bairo Pite Dili, no ba oin ekipa sei halo vizita ba empreza hotu ne’ebé eziste iha kapitál dili hodi halo levantamentu dadus ba empreza sira hahu hosi scane dokumentus Sertidaun Rejistu Komersial, Autorijasaun Ejersisiu Ka Deklarasaun Previa Sujeta ka Não Sujeta no Estatutu, halo mapa mento elektróniku ba fatin negócio nian nomos sei foto empreza sira nia eskritóriu.
MediaCCITL
