Kooperasaun Ekonomika Promove Investimentu Produtu Lokal ho Masin Midar Orgániku Iha Timor-Leste

Dili 01/24/2025-Vise Prezidente ba Dezenvolvimentu Ekonómiku no Planeamentu Estratéjiku, Dr. Hernanio Agustinho Soares hamutuk ho Prezidente CCI-TL Munisípiu sira hola parte iha serimónia abertura kooperasaun komérsiu ba Masin Midar organiku husi Nú no Akadiru (Coconut and Plam Organic Sugar) no planu investimentu iha Timor -Leste.

Seremonia koopersaun ekonomika promove investimentu produtu lokál ho masin midar orgániku iha Timor-Leste, hanesan topiku ba semináriu ne’ebé realiza durante loron ida iha Ótel Timor Dili, CCI-TL hanesan mahon ba emprezáriu sira partisipa iha semináriu ida nee hamutuk ho estrutura husi Nasionál to Munisipíu sira, objektivu partisipasaun CCI-TL  iha seremonia ida nee mak oinsa bele iha koñesementu ba kooperasaun ekonomika liu-liu promove investimentu produtu lokál hanesan halo produsaun masin midar. Semináriu ida nee importante teb-tebes no parte CCI-TL nia partisipasaun importante tebes mos hodi nune bele motiva hikas emprezáriu sira hodi fo atensaun ba investimentu ida nee iha futuru.

Investimentu hanesan dalan ba dezenvolvimentu ekonómiku haktuir  Dr. Hernanio Agustinho iha ninia diskursu ba partisipante sira, Vice-Prezidente CCI-TL asuntu  Dezenvolvimentu Ekonómiku no Planeamentu Estratéjiku akresenta liu-tan  katak investimentu ida ne’e hanesan oportunidade diak atu dezenvolve seitor agrikultura no produs produtu ne’ebe bele asesu ba merkadu internasional. Ho dezempregu ne’ebé a’as bele motiva no atrai investidór barak liután atu mai investe iha Timor-Leste, hasa’e produsaun lokál, no iha impaktu pozitivu ba ekonomia nasionál nunemós bele loke kampu serbisu ba Timor oan sira.

Fasilitasaun esportasaun hanesan parte ida husi estratéjia investimentu nian. CCI-TL hamutuk ho investidór sira ne’ebé fó garantia ba sertifikadu, embalajen no marka sira hodi haforsa asesu ba merkadu internasionál sira. branding “made in Timor-Leste” sei sai dalan ida ne’ebé fasil atu promove produtu lokál sira no ajuda ita kompete ho nasaun sira seluk.

Iha eventu ne’e, Sr. Sahat Marulitura Togatorop, Diretór PT. Fresh Vegetable Market In, esplika katak sei ajuda iha importasaun no prosesamentu matéria prima. “Ami nia objetivu maka atu transforma produtu lokál ba repackagem iha Timor-Leste no halo mos esportasaun, nune’e bele kontribui ba dezenvolvimentu lokál no empregu ba traballadór timoroan sira,” nomos fo Enfaze ba sustentabilidade ekonómika no kooperasaun ne’e fó prioridade ba sustentabilidade ekonómika.

Tamba Setór agríkola, hanesan plantasaun nu’u no akadiru, sei sai baze ba diversifikasaun ekonómika no aumenta asesu ba produtu lokál sira ba  merkadu internasionál sira. Esperansa ba futuru ekonomia Timor-Leste sei la’ós de’it buka asesu ba eksportasaun, maibé mós fó kontribuisaun ba empregu, promosaun produtu lokal, no sustentabilidade ekonomi nasional.

Semináriu koopersaun ekonomika promove investimentu produtu lokál ho masin midar orgániku iha Timor-Leste ne’ebé hala’o durante loron ida nee lao ho diak tebes tamba hetan partisipasaun husi entidades sira hotu ne’ebé partisipa iha programa ida nee nomos partisipantes sira Esklaresimentu husi esplikasaun ne'ebé nakonu ho motivasaun liu-liu programa planeamentu ba investimentu iha Timor-Leste.

Media-CCI-TL