Empreza Leadasi Unipessoal Lda, no Leova Lavtur Unipessoal Lda, Hahu Implementa Programa Investimentu Seitór Agrikúla Iha Munisipíu Manufahi.
Empreza Leadasi Unipessoal Lda, no Leova Lavtur Unipessoal Lda, Hahu Implementa Programa Investimentu Seitór Agrikúla Iha Munisipíu Manufahi.
Total asesu: 3960 minutes read
Ratings
(1)
Loron 13 janeiru 2025, Empreza Leadasi Unipessoal Lda nomos Empreza Leova Lavtur Unipessoal,Lda hanesan empreza rua husi empreza sanulu resin rua (12) ne’ebé asina ona akordu ho CCI-TL iha loron 7 fulan Janeiru 2025, hodi investe iha seitór agrikúla liu-liu kona-ba halo natar no hasa’e produsaun hare iha Timor-Leste espesialmente iha Munisipíu Manufahi hahu ona faze dahuluk implementasaun programa investimentu agrikúla iha natar no hasa’e produsaun foos tuir akordu ho CCI-TL.
Empreza rua ne’ebé reprezenta munisipíu Manufahi nudar empreza dahuluk maka asina ona akordu investimentu iha seitór agrikula ne’ebé maka sei investe iha natar no hasa’e produsaun hare, tamba nee mak hafoin asina tia akordu kompañia rua hahu kedas faze dahuluk hanesan prepara ekipamentu, fini ne’ebé atu tau iha bibeirus natar nian, traballador sira mak sei serbisu iha programa ida nee nomós koopera ho tékniku aplikator husi CCI-TL ne’ebé maka toma konta ba Munisipíu Manufahi nian hodi akompaña, observa no fo asisténsia tékniku haktuir ba akordu entre CCI-TL no Empreza sira. Entertantu kompañia Leodasi Unipessoal Lda sei implementa programa investimentu kuda hare’e iha Suku Betano Postu AdministrativuSame, Munisipíu Manufahi no kompañia Leova Lavtur Unipessoal Lda iha Suku Fatukahi, Postu Administrativu Fatuberliu, Munisipíu Manufahi.
Husi dada lia via telefone entre ekipa media CCI-TL ho emprezaria Sra. Martinha Santa Antunes hato’o katak, nia apresia tebes ba inisiativa CCI-TL nian hodi konvida emprezáriu sira hodi investe iha seitór agrikultura liu-liu oinsa bele hasa’e produsaun foos iha Timor-leste. Ho inisiativa diak ida nee diretora ba empreza nee halo kedas observasaun iha terenu hodi hare rai no natar ne’ebé besik 50 ektare abandonadu hela no nia mos relata katak tuir informasaun antes dehan katak be ka irigasaun a’at hodi prejudika ema labele halo natar maibe depois nia halo observasaun iha Suku betano identifika katak iha fatin balun be matan ne’ebé mak bele fornese be ba natar iha no permanente tamba nee maka nia parte hamutuk ho nia grupu feto maluk sira inklui maluk difesensia nain rua organiza malun hamutuk ho natar nain hato’o sira nia pedidu hakarak partisipa iha programa CCI-TL nian hodi investe iha natar liu husi nia empreza rasik.
Sra. Diretora nee mos akresenta liu tan katak, tempu ona atu ita hotu hamutuk aproveita ita nia potensialidade iha seitór agrikula, ita nian rain espesialmente rai Manufahi iha potensialidade boot ba seitór agrikultura liu-liu iha natar, tamba nee mak nia konvida grupu Mulher Manufahi atu hamutuk investe iha natar aproveita potensialidade ne’ebe ita iha hodi nune bele asegura produsaun ba hahan ita nian rasik.
Iha implementasaun ba aktividade hanesan husi empreza Leova Lavtur Unipessoal, ne’ebé implementa programa halo natar iha Suku Fatukahi, Postu Administrativu Fatuberliu, Munisipíu Manufahi, relata katak sira nia empreza hafoin asina akordu investimentu hamutuk ho CCI-TL sira hahu kedas organiza sira nia ekipamentu hodi hahu faze implementasaun programa kuda hare, no husi dada lia ne’ebé ekipa media CCI-TL halo ho Diretór empreza Sr. Leo da Costa Oliveira hateten katak, akordu inisíu sira iha deit ektare lima (5) ne’ebé sira prepara hodi halo natar maibe kuandu sira ba ona iha terenu natar nain sira oferese tan rai no natar ektare ne’en (6) no hamutuk natar ektare sanulu resin ida (11) maka empreza Leova Lavtur Unipessoal sei hala’o, noprograma implementasaun ba programa nee tuir nafatin akordu entre Empreza no CCI-TL.
Akordu investimentu seitór agrikula hanesan planu no programa CCI-TL nian, hafoin durante tinan-2024 halo ona programa demoplot hanesan faze inisíu no períodu probatóriu ne’ebé maka konsege hetan rezultadu diak hodi produz produtu dahuluk iha Timor-Leste ho naran foos Mana boot ne’ebé maka halo ona lansamentu iha fulan Setembru 2024 no fan ona mos ba iha públiku. Husi sucesso ida nee CCI-TL mai ho planu kontinuasaun ba faze investimentu nian no ikus iha empreza (28) mak hakarak investe maibe (12) mak prontu ona atu hahu faze implementasaun investimentu seitór agrikúla iha kuda no hasa’e produsaun hare, husi Munisipíu (5) Lautem, Baucau, Viqueque, Maliana no Manufahi no sei kontinua ba faze sira tuir mai kuandu iha empreza miko kiik sira hakarak atu investe mos iha seitór Agrikúla. Programa implementasaun ida nee lao tamba hetan mós apoiu husi IX Governu Konstitusionál liu husi Ministériu Koordenadór Asuntus Ekonómikus no Ministériu Turizmu no Ambiente.
