Iha ámbito implementasaun programa halo natar husi empreza rua husi Manufahi, Prezidente CCI-TL Sr. Leo Costa Oliveira partisipa no observa diretamente implementasaun ba programa ida nee iha Suku Fatukahi, Postu Administrativu Fatuberliu, Munisipíu Manufahi.
Objektivu husi programa ida nee mak haktuir ba akordu entre CCI-TL no empreza sira ne’ebé prontuona investe iha seitór agrikula inklui empreza rua husi Manufahi ne’ebé mos asina ona akordu iha loron 7 Janeiru 2025, Hodi nune empreza Leadasi unipessoal lda, investe no halo natar iha Suku Betano, Postu Administrativu Same,Munisipíu Manufahi ho total natar ektare rua (2), no empreza Leova Lavtur unipessoal lda, investe no halo natar iha Suku Fatukahi, Postu Fatuberliu, Munisipíu Manufahi ho total natar ektare besik sanulu resin ida (11), Empreza rua nee komesa hahu implementasaun iha loron13 fulan janeiru 2025, ho faze inisíu ba preparasaun fera-Rai, halo bi-beirus ba fini hare nunemos preparasaun sira seluk antes atu kuda hare.
Iha entrevista via telefone Prezidente CCI-TL Manufahi haktuir katak, nia parte tun diretamente mai iha terrenu hodi observa empreza sira nia servisu liu-liu ba implementasaun akordu investimentu ba kuda no hasa’e produsaun hare iha munisipíu Manufahi ne’ebé hala’o husi empreza Leadasi unipessoal lda nomos empreza Leova Lavtur unipessoal lda. Prezidente nee haktuir katak, inisiativa CCI-TL nian ida nee diak tebes atu oinsá ita bele ha-fanun ona emprezáriu sira hodi labele depende deit ba projeitu konstrusaun sira maibe ita bele muda ona hanoin hodi investe mos iha seitór agrikultura tamba iha Manufahi iha tebes potensialidade ba seitór agrikultura nian tamba nee mak tenki investe iha area agrikúla.
Prezidente nee mos akresenta liu-tan katak, nudar Prezidente CCI-TL nomos hanesan Manufahi oan nia sei koopera no husu emprezáriu sira iha Manufahi atu hamutuk tau atensaun ba seitór agrikultura, emprezáriu sira labele sai deit emprezáriu ba konstrusaun sivíl no hein deit projeitu governu nian maibe oinsá bele aproveita ita-nia rai no bee ne’ebé potensia boot tebes hodi bele produz hahan hanesan halo natar no hasa’e produsaun ba hare, Prezidente nee mos garante katak bainhira Manufahi oan liu-liu empreza sira tau atensaun no iha vontade hakarak investe iha seitór agrikúla maka seguransa ai-han ba Timor-Leste Manufahi prontu kontribui tamba Manufahi iha nia potensialidade ba seitór agrikula fo tebes vantazen.
Empreza Leadasi unipessoal lda nomos empreza Leova Lavtur unipessoal lda, husi Manufahi kumpri sira nia komitmentu hodi investe iha seitór agrikúla tuir akordu ne’ebé sira asina ona hamutuk ho CCI-TL, husi observasaun hatudu katak rai hamutuk ektare sanulu resin ha’at (14) mak sei uza husi empreza rua nee hodi halo natar no empreza hetan mos apoiu tékniku husi parte tékniku aplikatór CCI-TL nian ne’ebé sei permanente hamutuk ho empreza sira husi faze inisíu to iha faze kolleta hare.
